Ցեղասպանության հերքումը անընդունելի է Ֆրանսիայի տարածքում, քանի որ այդկերպ երկիրը համաձայնվում է նրանց հետ, ովքեր նման հայտարարություններ են անում: Այդ մասին դեկտեմբերի 22-ին Ֆրանսիայի Ազգային Ժողովում Հայոց ցեղասպանության ժխտումը քրեականացնող օրինագծի քննարկումների ընթացքում հայտարարել է Ֆրանսիայի սոցիալիստական կուսակցության պատգամավոր Պատրիս Կալմեժանը:
«Ես հուսով եմ, որ այսօր այստեղ քվեարկում են, լսում խղճի ձայնին: Ես հստակ քվեարկելու եմ օրինագծի օգտին եւ, հուսով եմ, որ այս ժամանակաշրջանը լինելու է խաղաղության հաստատման ժամանակաշրջան: Ռասիզմը կարծիք չէ, ռասիզմը հանցագործություն է: Որոշները վախենում են, որ օրենքը խանգարելու է հետազոտողներին: Բայց սա ձախերի կամ աջերի խնդիրը չէ, սա մարդու իրավունքների հարցն է»,- նկատել է նա:
Իր հերթին Ֆրանսիայի ԱԺ պատգամավոր Ժան Բարդեն նկատել է, որ դատապարտում է բոլոր բռնապետություններն ու կրոնական պատերազմները. «Ես դատապարտում եմ մահապատիժը: Պատմությունը թողնենք պատմաբաններին: Ես չեմ քվեարկելու այս օրենքի օգտին»:
Պատգամավոր Ֆրանսուա Բերուի խոսքով, օրինագծի տեքստը ողջամիտ չէ եւ վտանգավոր է. «Մենք որպես օրենսդիրներ ընդունել ենք, որ Ցեղասպանություն եղել է, բայց այս տեքստը տարբերվում է: Այն քրեական պատասխանատվություն է սահմանում նրանց նկատմամբ, ովքեր հերքում են: Շատերն ասում են, որ դա այլ բան է եղել: Ես դեմ եմ քվեարկելու»:
Նշենք, որ դեկտեմբերի 22-ին Ֆրանսիայի Ազգային ժողովում ընթանում է ցեղասպանության ժխոտւմը քրեականացնող օրինագծի քննարկումը: Օրենքով պատիժ է սահմանվում 45 հազար եվրո եւ մեկ տարվա ազատազրկում:
News.am
Chat
Category: 
Date Added: 2011-12-22 
