Ձյունը եւ սառնամանիքը կաթվածահար են արել Հին աշխարհի կյանքը: Բարդ իրավիճակ է Լեհաստանում, որտեղ մեկ օրում ցրտից յոթ մարդ է մահացել: Եվրոպայում հինգ օրվա ընթացքում սառնամանիքների պատճառով արդեն 80 մարդ է մահացել:
Ռեկորդային սառնամանիքներ են գրանցվել Բուլղարիայի հյուսիս-արեւելքում` Կնեժ քաղաքի շրջանում արդեն երկրորդ օրն է ջերմաստիճանը –29°С է: Այնտեղ արդեն երկրորդ շաբաթն է դպրոցները չեն գործում, տեղի գյուղերում տարեց մարդկանց մահերի մասին լուրեր են հաղորդվում:
Ռումինական ափի երկայնքով սառցակալել է Սեւ ծովը, ինչը խիստ հազվադեպ է պատահում:
Սառնամանիքին զուգահեռ, խնդիրներ է ստեղծում նաեւ ձյունը, որը հսկայական մակերեսով` Իտալիայի հարավից մինչեւ Թուրքիայի արեւելք, հանգեցրել է ավտոմոբիլային եւ օդային տրամսպորտի երթեւեկության ընդհատումների, ինչպես նաեւ ջրա- եւ էլեկտրամատակարարման խափանումների:
Իտալիայի կենտրոնական շրջաններում խոշոր բեռնատար մեքենաներին արգելվել է ճանապարհ դուրս գալ, հետաձգվել են իտալական ֆուտբոլային բարձրագույն լիգայի մի քանի ֆուտբոլային հանդիպումներ:
Հունաստանի հյուսիսում եւս դպրոցները փակվել են, այնտեղ –16°С սառնամանիքներ են գրանցվել:
Գերմանիայում ցրտից երկու կին են մահացել, նրանցից մեկն ընկել է ճամփեզրի առուն եւ սառել, մյուսը սառցակալած ճանապարհին կորցրել է մեքենայի կառավարումը:
Քնում են նաեւ կղզիները: Օրինակ Կորսիկայում տեղացած ձյան շերտը կազմում է 20 սմ:
Իսպանիայում երկրի իշխանությունները ինն ինքնավար շրջանների 17 նահանգներում տագնապի կարմիր եւ նարնջագույն մակարդակներ են ազդարարել: Դա պայմանավորված է ջերմաստիճանի խիստ նվազմամբ, անձրեւներով, ձյունով, քամիներով եւ ծովի ալեկոծություններով:
Ներկայիս սառնամանիքները բացատրվում են Սիբիրից եկած կայուն հակացիկլոնով, որն ընդգրկում է գրեթե ողջ Եվրոպան: Սպասվում է, որ սառնամանիքների գագաթնակետը կլինի շաբաթվա վերջին, հաղորդում է Euromag-ը:
News.am
Ուկրաինայում ցրտից արդեն 63 մարդ է մահացել
Ուկրաինայում վերջին օրերին ցրտից մահացածների թիվը հասել է 63-ի:
Ուկրաինայի առողջապահության նախարարության տվյալներով` վերջին վեց օրերին ցրտահարության գանգատներով 1146 մարդ է դիմել բժշկական հաստատություններ, որոնցից 945-ը հոսպիտալացվել են: Նախօրեին հաղորդվել էր 43 մահացածների մասին:
Այսօրվա դրությամբ, երկրում ջեռուցվող 2132 ապաստարաններ են գործում: Մոտ ժամանակներս ծրագրվում է բացել եւս 91-ը:
2012 հունվարի 27-ից փետրվարի 2-ն ընկած ժամանակահատվածում ջերմություն եւ տաք սնունդ ստանալու համար ավելի քան 41300 մարդ է դիմել, հաղորդում է rbc-ն:
Ուկրաինայի ԱԻՆ հիդրոօդերեւութաբանական կենտրոնի տվյալներով` մոտակա օրերին երկրում սպասվում են ուժեղ սառնամանիքներ` գիշերային ժամերին 25-30 աստիճան ցուրտ, Մերձկարպատներում եւ երկրի հյուսիսային հատվածներում` մինչեւ 33 աստիճան ցուրտ: Օդի ցերեկային ջերմաստիճանը կկազմի 17-22 աստիճան ցուրտ: Երկրի հարավային, արեւելյան շրջաններում եւ Դնեպրոպետրովսկի շրջանում գիշերային ջերմաստիճանը կնվազի մինչեւ 20-25 աստիճան ցրտի, իսկ ցերեկը կկազմի 12-17 աստիճան ցուրտ: Կարպատներում եւ Ղրիմում գիշերը կլինի 18-23, ցերեկը` 8-13 աստիճան ցուրտ:
News.am
Chat
Category: 
Date Added: 2012-02-02 
